Төгсөх ангийн сурагчдад элсэлтийн ерөнхий шалгалт амьдралынх нь чухал мөч байдаг. Сонгосон хичээлээрээ хамгийн өндөр буюу 800 оноо авахыг бүгд эрмэлздэг ч хичээж зүтгэж чадсан сурагчид энэ оноонд хүрдэг. Энэ жилийн элсэлтийн ерөнхий шалгалтад 800 оноо авсан Дорнод аймгийн 7 сурагч бий.  Тэдний нэг Цэвэгдоржийн Эрдэнэчимэгтэй уулзлаа.

Юуны өмнө 800 оноо авсанд нь баяр хүргэе. Өөрийгөө танилцуулахгүй юу?

Намайг Цэвэгдоржийн Эрдэнэчимэг гэдэг. Улсын тэргүүний 1-р сургуулийн 12г ангийг төгссөн. Элсэлтийн ерөнхий шалгалтаа Нийгмийн ухаан, Монгол хэл, Математик гэсэн 3 хичээлээр өгсөн. Монгол хэл дээрээ 800 оноо авсан.

Элсэлтийн ерөнхий шалгалтдаа 800 оноо авна гэдэгтээ итгэлтэй байсан уу, эсвэл эргэлзэж байв уу?

Би 12-р ангидаа орохдоо хоёр юмуу эсвэл нэг хичээл дээрээ 800 оноо авна гэж өөртөө зорилго тавьсан. Нийгмийн ухаан, Монгол хэл 2 дээрээ 800 оноо авна гэж байсан боловч нийгмийн ухаан дээрээ 700 гаран оноо авсан. Эхлээд нийгмийн ухааны ЭЕШ өгсөн. Хүссэн оноондоо хүрч чадаагүйдээ бүтэн өдөр уйлсан. Тэр үед манай үеэлүүд ЭЕШ өгөх гээд хөдөөнөөс ирсэн байсан. Тэд нар 700 давна гэдэг сайн ш дээ гээд намайг тайтгаруулсан. Мөн манай ах эгч нар бас 700 давна гэдэг маш том амжилт гээд надад урам өгч байсан. Тэгээд дараа нь Монгол хэлний шалгалт өгөөд 800 оноо авсандаа баяртай байна.

Хүссэн, зорьсон оноогоо авахад төрсөн мэдрэмжээ илэрхийлбэл?

Тухайн үед Тоонот 21 тоглолт үзэж байсан. Ангийн багш маань над руу залгаад 5 минут тутамд оноогоо орж хараарай гэсэн. Тэгээд тоглолт үзэж байгаад нэг шалгасан чинь оноо маань гарсан байсан. Оноогоо хараад үнэхээр их баярласан. Тэр өдөр миний төрсөн өдөр байсан. Тэгээд давхар баяр болсон.

ЭЕШ бэлдэхдээ мэдлэгээс гадна сэтгэл зүйн бэлэн байдлыг хангах ёстой болов уу?

Би ЭЕШ аймаар сандарч орж байсан. Сэтгэл зүйгээ ердөө бэлдээгүй. Орох өглөөнөөсөө эхлээд гар салганаад хүйтэн болоод байсан. Гэхдээ өөртөө зорилго тавьсан байсан болохоор чадсан гэж бодож байна.

Элсэлтийн ерөнхий шалгалтад бэлтгэсэн багшийгаа танилцуулахгүй юу?

Бид нарыг бэлтгэсэн багш маань бол манай ангийн багш н.Ариунсанаа. Анхных нь ЭЕШ өгч байгаа хүүхдүүд нь бид нар. Багш маань анхныхаа ангиар ЭЕШ өгүүлж байгаа болохоор өөрөө сандарч байсан. Ер нь 9 сараас эхлээд л монгол хэлнийхээ давтлагыг эхэлж тасралтгүйгээр бэлтгэсэн.  7 хоногт 3-4 өдөр давтлагад суудаг байсан. Багш маань манай ангийг 6-р ангиас авсан. Орос хэлний багш. Тэгээд монгол хэл рүү хөрвөөд монгол хэл уран зохиолын багш болсон. Хичээнгүй мундаг багш гэж хэлнэ.

Ямар мэргэжлээр сурах вэ? Мэргэжлээ хэддүгээр ангид сурч байхдаа сонгож зорилгоо болгосон бэ?

Би багаасаа л хуульч өмгөөлөгч болно гэж боддог байсан. Манай ах маань цэргийн хүн. Тэгээд би цэргийн хүн болно гэхэд ах маань цэргийн хүн болоод хэрэггүй гэж зөвлөсөн. Одоо хуулийн чиглэлээрээ Монгол улсын их сургуулийн эрхзүй хуулийн анги руу орох сонирхолтой байгаа. 8-р ангиасаа яг хуульч болно гээд шийдэж байсан.

Мэргэжил сонголтын тал дээр ээж аав нь оролцсон уу?  

Манай аав ээж 2 бол намайг өөрийнхөө дуртай чиглэлээр л сураарай гэсэн. Чамайг ямар ч мэргэжилтэй болсон бид нар дэмжинэ гэсэн. Тэгээд би хуульч л болно гэж зорьж байгаа.

Хүссэн сургуулиа авч чадлаа. Одоо дараагийн зорилгоо юу гэж тодорхойлж байна?

Их сургуулиа амжилттай төгсөөд гадаадад сураад Монголдоо буцаж ирж ажиллана.  Хуулийн фермтэй болно гэж бодож байгаа. Тэгээд төлбөрийн чадваргүй хүмүүс байдаг ш дээ. Тийм хүмүүст тусалж, дэмжлэг үзүүлж ажиллана гэсэн зорилт тавьсан.

Оюутан болно гэхээр ямар санагдаж байна?

Аймаар эвгүй байдаг юм байна.  Ингээд их сургуульд орно. Ангийнхантайгаа уулзаад байж чадахгүй, ангийнхаа багштай уулзаж чадахгүй болохоор аймаар сонин мэдрэмж төрж байна. Гунигтай ч гэх юм уу.

Чиний хувьд  ямар зан чанартай хүүхэд байв. Дурсамжтай мөчөөсөө хуваалцвал?

Би ер нь бол дуугай. Хичээлээ л хийгээд явж байдаг. 9-р ангид байхад “Түгээгч тээгч” гээд монгол бичгийн уралдаан болсон. Тэр уралдаанд бэлдэж байхдаа зам хөндлөн гарахдаа хүртэл Монгол бичгээ уншаад явж байдаг байсан . Тэр үед 200 давуулж уншина гэдэг зорилт тавиад түүнийхээ төлөө явж байсан.

ЭЕШ бэлдэж байх үедээ юунаас  их урам авдаг байв?

Манай ангийнхан намайг чи хүссэн сургуулиа авч чадна, чи хичээж байгаа гэдэг байсан. Бас аймгаас сар бүр шалгалт авдаг, тэр оноог хараад багш нар маань чи сайн ахиж байна, энэ байдлаараа бол хүссэн оноогоо авч чадах юм байна гээд урамшуулж байсан. Би өөртөө зорилт тавиад явж байсан болохоор шантрах ухрах үе байгаагүй.

ЭЕШ-д амжилттай бэлтгэсэн туршлагаа бусадтайгаа хуваалцахгүй юу?

Сайн бэлдэх юм бол үр дүн заавал гарна. ЭЕШ-д зарим хүүхдүүд 9 сараас зарим нь 4 сараас бэлдэж эхэлж байгаа. Харин ихэнх хүүхдүүд цагийг нь тулгаж бэлдээд өөрт ирэх ачааллаа аймар их болгодог,  2-р гэвэл оноондоо хүрч чадах болов уу гэсэн эргэлзээ их төрдөг юм шиг байна лээ, зарим хүүхдийн хувьд 9 сараас эхэлж бэлдсэн мөртлөө дундаас нь болих, няцах асуудал гардаг юм байна. Тиймээс ер нь бол өөрийнхөө тавьсан зорилгын төлөө битгий няцаарай, заавал эцсийг нь үзээрэй гэж хэлмээр байна. Ингэхийн тулд өөр зүйлд сатаарахгүйгээр өөрийнхөө хамгийн сайн гүйцэтгэх хэмжээнд хийхийг зорилгоо болгоорой гэж хэлмээр байна.

Ярилцсанд баярлалаа, харин чи Баярлалаа гэдэг үгийг хэлэхийг хүсэж байгаа хүндээ манай ярилцлагаар дамжуулан илэрхийлэхийг хүсэж байна?

Ангийн багшдаа хамгийн их баярлалаа гэж хэлмээр байна. Намайг энэ амжилтад хүрэхэд хамгийн их түлхэц болсон хүн бол Ариунсанаа багш маань. Тиймээс багшдаа баярлалаа.